O Concello de Melide vén de aprobar na última Xunta de Goberno Local cinco novos proxectos que serán executados dentro do segundo Plan E do Estado, o Fondo Estatal para o Emprego e a Sustentabilidade Local.

O proxecto de máis peso económico, e o que quixo priorizar o equipo de goberno pola súa importancia para os melidenses, foi o que suporá o acondicionamento da área recreativa de Furelos, que conta cun presuposto de 300.000 euros. A través desta actuación, o concello realizará un saneamento sobre a canle do río, rehabilitando os mecanismos existentes e realizando obras hidráulicas para a limpeza dos fondos. Pero a mellora máis importante será a que se executará sobre as zonas verdes que todos os veráns son frecuentadas pola veciñanza de Melide.

A  Concellaría de Medio Ambiente, que dirixe o socialista Manuel Prado, vén de dar por rematada a segunda campaña de recollida de plásticos agrícolas. Un camión do Concello percorreu as parroquias do rural melidense onde previamente a veciñanza tiña depositado os plásticos agrícolas para a súa reciclaxe.

O concelleiro Manuel Prado destacou “a colaboración dos veciños, e a súa concienciación coa reciclaxe, que se incrementa en cifras campaña tras campaña”. Nesta ocasión,o Concello recolleu máis de 20.000 quilos de plásticos agrícolas, que serán tratados para a súa reciclaxe. Fonte Concello de Melide